A Coruña énchese de deseño coa Galicia Design Week 2022
Durante os meses de xuño e xullo A Coruña será a sede da GDW22, un evento que ofrece conferencias, presentacións de proxectos, exposicións, roteiros, gastronomía, obradoiros e revisións de portafolios, nun formato híbrido con clara intención de achegar o deseño ao público xeral da man de profesionais do sector.
A Galicia Design Week ofrece programación en catro eixos diferenciados: o Pro, con catro días de conferencias e presentacións; o Showcase, que inclúe tres exposicións dedicadas ao deseño; o Showroom, un escaparate dixital de creacións galegas e un roteiro por estudios e espazos de deseño da Coruña; e o Camp, con catro obradoiros e revisión de portafolios.
Nas conversas Pro do venres 24 e do sábado 25 participan 9 profesionais galegos mesturados con 5 referentes nacionais. O público poderá gozar dos traballos e da experiencia de, entre outros, Kike Besada, Realmente Bravo, Óscar Germade e extratype, Verónica Bello de Designit, Estefanía Casal, Lucía Freitas, Laura Delgado e Idoia Cuesta, ou a nosa compañeira Uqui Permui.
O domingo 26, a xornada está protagonizada pola DAG. Pola mañá falaremos dos proxectos nos que estivemos inmersos estes últimos meses, como o Estudo da Economía do Deseño en Galicia, e tamén dos novos nos que estamos a traballar, como o 10ENAD que terá lugar en Pontevedra o 21 e 22 de outubro. Pola tarde, daremos paso á presentación de traballos de asociadas e contaremos con Adrián Parcero de Guillotina Estudio, coa deseñadora dixital Begoña Pastoriza, con Alberto Rodríguez e o seu proxecto A marca compostela, e Thais Suárez da axencia creativa Sísmica.
O mércores 29, Gain organiza o Encontro de Deseño para a Innovación no CIS Ferrol, con motivo da celebración do Día Internacional do Deseño Industrial. Este ano centrará o contido en tres temas de gran relevancia: futuro dixital e desenvolvemento sustentable, o rural como motor empresarial e de innovación, e a economía circular e creativa. Para asistir de xeito presencial hai que confirmar asistencia xa que o aforo está limitado, mais tamén se poderá seguir en liña. Haberá autobuses desde A Coruña para asistir.
Desde o venres 24 ata o 17 de xullo, a cidadanía poderá visitar os tres espazos expositivos Showcase: «O mellor deseño do ano» e «O futuro deseño galego» no Palexco, e «O novo deseño galego» na Praza de Pontevedra. Ademais o 30 de xuño está prevista unha visita guiada polas tres exposicións que se complementa coa presentación do libro Vivir del diseño de Ana Gea.
Do venres 24 ao xoves 30 de xuño, organízase o Showroom, un escaparate dixital de creacións de deseño galego e unha serie de visitas a estudios e espazos de deseño da cidade. E entre o luns 27 e o venres 30 de xuño, no estudio Follow, o Camp, ofrecerá unha serie de obradoiros especializados dirixidos a estudantes avanzados e profesionais. Os talleres versan sobre deseño de produto, branding, paixasismo e emisión en streaming.
A sede principal da GDW será o estudio Follow aínda que gran parte da programación se poderá seguir vía streaming. As entradas son de balde e é preciso inscrición previa a través da plataforma DICE.