A DAG colabora co programa Xuventude Mentoring da Xunta de Galicia
Xuventude Mentoring é un programa integral de formación e mentoría destinado a persoas mozas tituladas e inscritas no Sistema Nacional de Garantía Xuvenil na Comunidade Autónoma de Galicia. A DAG colabora difundindo información sobre o proxecto e servindo de canle para a incorporación de persoas asociadas como mentoras. Nesta edición contouse coa colaboración do deseñador industrial Javier Ferrín e a deseñadora editorial Paula Cantero de Origami Estudio.
O programa busca favorecer a transición á vida laboral das persoas mozas con estudos de grao ou de formación profesional e está destinado á mellora das habilidades e competencias para a busca de emprego, tanto por conta propia como por conta allea, a través de accións formativas, actividades de networking e dunha rede de persoas mentoras procedentes do empresariado galego, que ofrecerán asesoramento e apoio. Os e as participantes ademais terán un asesoramento continuado por parte do equipo especializado do programa.
O proceso de inscrición estivo aberto desde o 6 de agosto ata o 15 de setembro de 2021, e todas as accións deseñadas no programa nesta edición, desenvolvéronse entre os meses de outubro e decembro.
O programa está promovido pola Xunta de Galicia e o Consorcio para o desenvolvemento de aplicacións de xestión universitaria (Cixug), cofinanciado polo Fondo Social Europeo e a Iniciativa de Emprego Xuvenil, nun 91,89%, con cargo ao Programa Operativo de Emprego Xuvenil, para o período 2014-2020, no eixe prioritario 5, obxectivo temático 8, prioridade de investimento 8.2, obxectivo específico 8.2.1, medida 8.2.1.1.