A DAG conta cunha entrada no Diccionario do deseño e da innovación
ABC Deseño, o Diccionario do deseño e da innovación, editado pola Xunta de Galicia e Fundación DIDAC contén 100 fichas de profesionais, estudios e proxectos de deseño ordeados alfabeticamente para a súa fácil consulta. A DAG é unha delas.
A primeira edición do Diccionario do deseño e da innovación en Galicia, presentouse en Santiago de Compostela o pasado mes de novembro de 2022 e é unha das iniciativas lanzadas pola Xunta de Galicia a través da Axencia Galega de Innovación en colaboración coa Fundación DIDAC, dentro do programa Deseño para a Innovación Diferenza 2024. Esta primeira edición ofrece unha selección de 100 fichas de profesionais, estudios, proxectos, iniciativas empresariais e entidades ligadas ao deseño que participaron das diferentes accións desenvolvidas pola Xunta de Galicia desde o inicio do programa en 2018.
A DAG forma parte da publicación como entidade representante dos e das profesionais do deseño en Galicia, e como colaboradora habitual do programa impulsado pola Xunta. Asemade, algunhas das asociadas á DAG tamén están presentes nesta primeira edición, como Álvaro Valiño, Cenlitrosmetrocadrado, Costa, Desescribir, Desoños, Idoia Cuesta, Pepe Barro e o Grupo Revisión, María Ramos, Marcos Dopico, Numax, Nuria Carballo, Roberto Núñez ou Uqui Permui. Moitas máis sumaranse nos próximos meses en posteriores edicións, pois é un proxecto que medrará co paso do tempo coa inclusión de máis fichas de referencia para consulta e interese do sector e da sociedade en xeral.