A EASD Ramón Falcón cumpre 50 anos
O pasado 24 de marzo inaugurouse no Vello Cárcere de Lugo a exposición «Cabeza, Man, Corazón», a primeira das principais accións conmemorativas deste 50 aniversario da EASD Ramón Falcón.
O 50 aniversario da escola produciuse realmente no ano 2019, mais a pandemia fixo que todos os plans de celebración que se planificaran para ese curso académico se retrasaran e puideran ser unha realidade neste curso 2022-2023.
Unha das accións máis importantes que organiza a Escola é a exposición «Cabeza, Man, Corazón», inaugurada o pasado 24 de marzo no Vello Cárcere de Lugo e que pode visitarse ata o 30 de abril. O título destaca tres termos, «cabeza» para a creatividade e a imaxinación, «man» para a habilidade e o oficio, e «corazón» para a honestidade e o amor, como xermolo das escolas de artes e oficios entendidas como centros para o estudo, preservación e investigación dos valores artesáns, artísticos e de deseño.
A exposición amosa un percorrido polos 50 anos de historia do centro a través de intervencións do propio alumnado que pasou pola escola durante todos eses anos. Dentro do centenar de participantes da mostra atopamos socios e socias de DAG, como o noso presidente Xóse García de Piedrapapeltijera, José Manuel Pérez de Era Comunicación, Marta Castro de Hey Castro ou Segundo Fdez de Sond3, entre outros.
A segunda exposición preparada para este aniversario terá lugar na Capela de Santa María de Lugo e poderá visitarse desde o 14 de abril ata o 21 de maio. Nela o alumnado actual do centro revelará a súa particular visión do futuro, onde a escola será sempre o punto de encontro.
Seguide atentas á web e ás redes sociais da EASD Ramón Falcón para coñecer de primeira man todos os actos conmemorativos deste 50 aniversario.