Antonio Doñate e Carlos Hidalgo, novos socios da DAG
Nesta ocasión damos a benvida a dous novos socios. Toni e Carlos son os nomes detrás da alma gráfica de Numax, un proxecto ben coñecido polo seu espírito pioneiro e innovador. Esta cooperativa, contedor de varias disciplinas do sector cultural, é unha auténtica fervedoira de ideas e proxectos aos que dan forma desde o seu laboratorio creativo.
Ola, somos Toni e Carlos e facemos parte da cooperativa Numax dende a súa apertura hai cinco anos. Numax é máis coñecida pola súa cara pública, a do seu cinema e a súa libraría; pero por detrás, e tamén dende o seu inicio, alberga un espazo creativo ao que demos en chamar Laboratorio. E alí traballamos nós, xunto a outras catro compañeiras.
No Laboratorio Numax, ademais de coordinar e elaborar a identidade da cooperativa, desenvolvemos proxectos externos de deseño, comunicación e produción e posprodución de vídeo. Alí, ocupámonos da área de gráfica e deseño web, e aínda non nos cansamos do oficio, de tentar poñer atención ao detalle en cada fase para que o resultado dos nosos traballos sexa útil e diferente a un tempo.
Unha aperta e moitas grazas por acollermos.