Camiñando cara ao 10 ENAD
Os próximos 21 e 22 de outubro celebrarase, no edificio Castelao do Museo Pontevedra, o 10ENAD. A décima edición dos Encontros Nacionais de Deseño que organiza READ e DAG, como asociación que ocupa a actual presidencia, desenvolverase baixo o lema «Cidades imaxinadas, cidades deseñadas» coa intención de responder á cuestión: «en que tipo de cidades queremos vivir?»
En canto ao programa, a xornada do venres abrirase cunha conferencia maxistral de Tamara Pérez e Guillermo Parada do estudio chileno GT2P, que utiliza o deseño paramétrico para crear artefactos urbanos. A continuación, unha mesa redonda na que coñeceremos diferentes e interesantes proxectos, nos que participarán Flora Pescador, arquitecta paisaxista; Space 10, laboratorio de investigación e deseño de IKEA; To Good To Go, un movemento contra o desperdicio de alimentos; Montse Rodríguez Ojea, directora de innovación da Axencia Galega da Industria Forestal (XERA); e Miguel Arraiz, arquitecto e creativo que se conectará desde o Àgora València. A mañá fnalizará con un debate moderado por María Navarro sobre «como deseñar os lugares que habitamos para facelos máis sustentables?».
O sábado repítese o esquema de funcionamento con Pablo Sendra, arquitecto que combina a docencia na Bartlett School of Planning del University College of London coa práctica profesional do deseño urbano. Unha nova mesa redonda participada por María Novas, arquitecta e investigadora autora del libro Arquitectura y género; Amelie Aranguren, responsable do Centro de Acercamiento a lo Rural (CAR), socia de Campo Adentro e Premio Mini de Diseño 2022; Pezestudio, estudio de arquitectas de Bilbao, Madrid e Lima que deseñan espazos, procesos e servizos de forma participativa; e Inés Novella, arquitecta urbanista desde València. A presidenta de READ Uqui Permui moderará o debate «como son as cidades nas que queremos vivir?» co que porase punto e final á sesión de conferencias.
Complementan o programa varias actividades que se desenvolverán de forma paralela e que iremos contando proximamente.
Unha parte fundamental dos ENAD son as mesas de traballo que buscan no encontro o momento de poñer en común todo o traballo desenvolvido ao longo do ano e que orixina as liñas de actuación de cara o futuro da rede. Así, a tarde do venres está adicada a seis mesas que xiran en torno ás seguintes temáticas:
- Deseñando ecosistemas habitables, coordinada por Marta Pascual
- Internacional / FSWD, coordinada por Juan Lázaro e Nerea Domenech
- Transitando o impensable, coordinada por Mari Carmen Estevan de Gráficas en Negro
- Educación e deseño, coordinada por Juana Valcárcel e Daniel Hervás
- Chamadas a proxecto. Ese gran descoñecido, coordinada por Ana Rodríguez
- Presentamos o SNIC (Sistema Nacional de Intelixencia Creativa), coordinada por Irene García e Mónica Bonafonte
A imaxe corporativa foi deseñada polo socio de DAG Samuel Baltar, do estudio Orixe, e en breve presentaremos a páxina web na que ademais de coñecer todos os detalles do encontro poderedes inscribirvos e participar nas mesas de traballo programadas, das mesas redondas, conferencias e debates.