Conferencia de Nacho Lavernia, Premio Nacional de Deseño, no Centro Galego de Arte Contemporánea
O vindeiro xoves 13 de xaneiro ás 18:00 h. no CGAC, Nacho Lavernia ofrecerá a conferencia «Exportar deseño e deseño para exportar» no marco da exposición «FSWD: Identidade e territorio»
From Spain With Design (FSWD) é un proxecto de READ, Rede Española de Asociacións de Deseño, concibido de forma colaborativa como unha ferramenta para a proxección do deseño español a nivel nacional e internacional. Froito deste proxecto inaugurouse o pasado 15 de outubro a exposición «FSWD. Identidade e territorio», que recolle proxectos de deseño de distintos ámbitos, entre eles o deseño de estoxos, especialidade na que sobresae Nacho Lavernia, Premio Nacional de Deseño no 2012 e un referente a nivel internacional.
A exposición conta cun acordo firmado entre a Xunta de Galicia e READ a través da Axencia Galega da Industria Forestal, para a divulgación do uso da madeira galega como elemento para o deseño. Deste xeito todas as mostras desta exposición itinerante, que se desenvolverá en varias cidades e países, utilizarán como soportes das pezas unhas peanas realizadas de maneira artesanal en Galicia con madeira local.
As prazas para a conferencia cubriranse por orden de inscrición e posteriormente, ás 19:00h, realizarase unha visita guiada á exposición. «FSWD: Identidade e territorio» está comisariada por Uqui Permui (DAG), Ángel Martínez (ADCV), Gloria Escribano (DIMAD) e Juan Lázaro (Cuenca Diseño) e pode visitarse ata o 30 de xaneiro.