Dardo, Coma e Era Comunicación premiados nos Anuaria
A XXXII edición dos Premios Anuaria vén de publicar os traballos gañadores e temos que destacar catro proxectos de persoas asociadas.
Tanto DARDO, como Era Comunicación e o estudio Coma levaron unha Selección Anuaria en cadansúa categoría.
O estudio DARDO, do que forma parte a nosa asociada Conchi Mayo, recibiu unha Selección Anuaria ao mellor deseño dunha pubicación editorial polo catálogo Mery Pais. Lei eterna. Unha colección de pezas únicas que daba continuidade á performance e ao traballo da artista exposto na Fundación DIDAC e que recupera retais téxtis usados.
Era comunicación, o estudio pontevedrés do que forma parte o socio José Antonio Pérez Gil, levou dúas Seleccións Anuaria na categoría de mellor cartel. Unha polo deseño do cartel para o Nadal de Pontevedra onde a simplicidade das formas da lugar a unha identidade visual moderna e cálida; e a segunda para o deseño do Festival internacional de jazz e blues da mesma cidade, onde a imaxe céntrase nunha metáfora visual que conecta o corpo coa música. Ambos traballos encargados polo concello de Pontevedra.
Pola súa banda, Coma comunición creativa, estudio do que forma parte o noso compañeiro Carlos El Rojo, levou unha Selección Anuaria na categoría de mellor anuncio de prensa co deseño realizado para Noraves, un proxecto coordinado polo CEIDA que busca reducir a mortalidade das aves mariñas causadas polas artes de pesca. A campaña visual comunica a coexistencia entre conservación e pesca mediante fotografías documentais e mensaxes tipográficas claras que destacan logros científicos e tecnolóxicos.
Os Premios Anuaria son os premios de deseño gráfico con máis apoio no sector en España e conta co respaldo das princiapais organizacións, centros de deseño e prensa especializada. O xurado está formado exclusivamente por membros designados polas principais organizacións profesionais.