O estudio galego desescribir nominado a dous Laus na súa 50ª edición
As obras recoñecidas son o catálogo da exposición «Pensar coas mans. Cestería, cerámica e xoiería de Galicia», editado polo Museo Gaiás da Cidade de Cultura de Galicia, e o libro «Approach 2018-2019», deseñado para a Washington University.
Os Premios Laus, outorgados polo ADG-FAD de Cataluña, son os premios de deseño de maior prestixio en España e un dos máis importantes a nivel europeo. Dende 1970 recoñecen os mellores traballos realizados a nivel internacional nos eidos do deseño, a publicidade e a comunicación. O xurado que concede os premios cambia cada ano. Os nomes dos seus integrantes parten sempre dunha coidada selección, na que se inclúen profesionais de grande relevancia internacional.
Este ano, celebramos a selección de dúas obras creadas polos nosos socios Cibrán Rico e Suso Vázquez, na categoría de deseño gráfico. O seu estudio, desescribir, xa conta no seu palmarés particular con 10 Premios Laus, dous Premios D&AD, e un Premio PHotoEspaña ao mellor libro de fotografía publicado en España, entre outros méritos e recoñecemento ao seu traballo.
A cerimonia de entrega de premios, onde se darán a coñecer os diferentes galardóns, celebrarase o día 26 de novembro, dentro do programa da Barcelona Design Week.