Dúas pezas de Desescribir seleccionadas nos premios anuais do Tokyo Type Directors Club
Os socios Suso Vázquez e Cibrán Rico, do estudio Desescribir, están de noraboa pola recente nominación do libro «Iremos al Sol/Towards the sun» de Regina Giménez e do cartel deseñado para a película ONS, como finalistas dos Premios Tokyo Type Directors Club.
Os Tokyo TDC Annual Awards son uns premios de prestixio internacional que se celebran dende 1990. Valoran traballos onde prima a expresión visual e as letras e as palabras toman o protagonismo. Entre os gañadores das últimas edicións están estudios como OK-RM de Londres ou M/M de París. A mediados deste mes de xaneiro comunicarase a selección final do xurado.
O libro «Iremos al sol/Towards the sun», que deseñaron e editaron para Fabulatorio, está coeditado co Museo Patio Herreriano de Valladolid e foi publicado co gallo da exposición que, baixo o mesmo nome, tivo lugar nese museo do 19 de setembro de 2020 ao 17 de xaneiro de 2021. A súa autora, Regina Giménez, é unha artista contemporánea de renome tanto a nivel nacional como internacional, que traballa elementos extraídos do seu contexto natural para reinterpretalos con diferentes técnicas. Por outra banda, o cartel da película ONS, de Alfonso Zarauza, unha das grandes triunfadoras dos Premios Mestre Mateo 2021, xa foi premiado cun Laus de Bronce o ano pasado.
Fabulatorio é a editora independente que os compañeiros da DAG crearon en 2012, centrada en proxectos sobre arte, deseño e cultura visual. Este libro forma parte da colección Somnámbulo Funámbulo, pezas editadas en cooperación con museos, institucións, colectivos ou persoas individuais. Non é a primeira vez que os seus traballos están nominados a premios de alcance internacional.