Estreamos ano coa nova incorporación de Yago Concejo
Comezamos 2022 sendo xa 80 asociadas, con ganas de seguir avanzando e colaborando para mellorar a situación do sector. Yago Concejo é unha das últimas incorporacións, despois dunha longa traxectoria profesional, volve a atreverse cun novo proxecto, Sr. Concejo, destacando na creación de marca. Benvido Yago!
Ola!
Son Yago Concejo, Sr. Concejo para os amigos. De pai coruñés marino e debuxante e nai castelá xestora, teño unha mestura curiosa que me axudou a defenderme cos recibos de autónomos a base de deseño.
Por unha serie de catastróficas e afortunadas desgrazas acabei aprendendo o oficio de taller durante uns meses, nunha empresa de rotulación con plotters de corte, impresión e música de Eddie Grant. Arrencendía a adhesivos.
Logo viñeron tempos de formación regulada na Escola Superior de Arte e Deseño Pablo Picasso facendo Gráfica Publicitaria, compatibilizando co traballo no departamento de preimpresión dunha pequena imprenta, e como o verán é para gozar, comencei a traballar nunha axencia de publicidade das grandes (en Coruña, tampouco creades).
En 2005 decidín que o de estar sempre naquela cadeira non era para min e empecei traballar pola miña conta con Singulart Comunicación, ata que chegou Venditos Axencia Creativa, un proxecto a medias con Chío Infante que contraeu COVID.
En 2021 volvo á conta propia, agora con canas e cun propósito de renovación e reconversión a un deseño máis puro, más especializado e nesta asociación busco empaparme de novas formas de facer as cousas, novos estilos e un asociacionismo enfocado ó deseño en calquera das súas áreas.
Estou desexando coñecervos e ver todo o que facedes.
Moitas apertas.