Iria Iglesias, benvida a DAG
Desde o estudio Gnomo, en Lugo, chega unha das nosas últimas asociadas. Coñece máis sobre esta diseñadora gráfica e ilustradora.
Ola!
Chámome Iria Iglesias, son de Vigo pero actualmente deseño dende unha aldea no sur de Lugo. Son deseñadora gráfica publicitaria de formación e por vocación. Cando rematei os meus estudos en Vigo empecei a traballar cunha axencia de comunicación na que o principal cliente era a universidade de Vigo, de alí lévome o recordo de que o alumnado roubara os carteis que deseñei para decorar as súas habitacións.
Despois traballei en Bimba y Lola, sendo a primeira deseñadora gráfica en plantilla da empresa, puidendo traballar de forma creativa, facendo ilustracións ou estampados, e de forma máis técnica, elaborando as fichas de produto. Tras uns anos a vida levoume facer un cambio radical, mudeime a unha aldea rodeada de bosques, dende alí traballo no meu propio estudio de deseño, GNOMO, no que ademáis de desenvolver proxectos de deseño gráfico tamén ilustro e conto con varios libros publicados.
Encántame a miña profesión, vou pola vida vendo combinacións de cores, texturas e formas e entendo o deseño gráfico coma a linguaxe visual perfecta. Decidín unirme á DAG para coñecer máis compañeiros/as no sector cos que compartir coñecementos e inquedanzas. Un pracer formar parte de esta asociación.