O pasado 7 de decembro presentábase na Cidade da Cultura a nova páxina web adicada á figura de todo un referente histórico do deseño en Galicia: Isaac Díaz Pardo (22 de agosto de 1920 – 5 de xaneiro de 2012), impulsor de Sargadelos, Ediciós do Castro, o Instituto Galego de Información, o Laboratorio de Formas ou o Museo Galego de Arte Contemporánea Carlos Maside.

Esta nova web recolle material sobre a vida e a obra deste polifacético creador e ten como obxectivo facer accesible a todas e todos o seu legado. O sitio funciona como centro dixital de recursos reunindo todo o universo creativo de Díaz Pardo e podendo consultar nel documentos históricos, fotografías, audiovisuais e material didáctico.

Espazo aberto á cidadanía e persoal investigador

A web «Memoria viva» consta dun total de oito seccións, nas que se tratan cuestións como a vida de Díaz Pardo, familia, amizades, obra, o Laboratorio de Formas, traxectoria empresarial e fontes de estudo. Este último apartado está especialmente dirixido a persoal investigador e nel é posible descargar documentación variada, amais de consultar a listaxe de todas as obras escritas por Díaz Pardo.

Por último, a sección Arredor de Isaac é un espazo onde se recollen as novas e acontecementos actuais relacionados coa vida e obra de Díaz Pardo: exposicións, homenaxes, publicacións e demais traballos sobre a súa figura.

Sinatura de socios da DAG

Detrás desta nova web están varios socios da DAG. Por un lado, o deseño gráfico e programación da mesma están asinados polo estudio Costa da Coruña, cos socios David Silvosa e Dani Bembibre á fronte. Por outro, o deseñador gráfico e tipógrafo Marcos Dopico, ademáis de membro da DAG, é o creador da «tipo» empregada na web, a Isaac Sans, que debe o seu nome ao propio Isaac Díaz Pardo.

A páxina web «Memoria viva» está dispoñible actualmente en galego e castelán e próximamente tamén o estará en inglés.