Nace en Galicia o Festival de Deseño #follow
Hoxe comeza o #follow20, un festival que ten por obxectivo poñer en valor o deseño galego conectándoo co exterior e o gran público, e que servirá de antesala do lanzamento da Galicia Design Week en xuño do 2021.
Os contidos do festival estarán divididos en seis actividades diferentes e nelas participarán varios socios e socias da DAG. Na sección de «stories» —pequenas pezas documentais— veremos a David Silvosa e Dani Bembibre do estudio Costa, xunto con María Ramos do estudio NM Type; tamén será protagonista a nosa socia Conchi Mayo como representante do estudio Dardo. A sección de «conversas» contará coa participación de Dani Bembibre, Artur Galocha, Marcos Dopico e Uqui Permui, que falarán de marcas, infografía, tipografía corporativa e deseño como comunicación cultural. Os e as protagonistas destas «stories» e «conversas» colaborarán tamén ofrecendo asesoramento persoal en proxectos de estudantes e profesionais noveis.
O festival abrirá ademáis un «showroom», que servirá de escaparate de creacións e espazos de deseño galegos e contará cunha carpa na Praza de Lugo (A Coruña). Este espazo acollerá unha serie de intervencións do colectivo Flaco, incluirá a proxección das «stories» e «conversas» e albergará unha exposición de traballos profesionais do denominado pola organización como «novo deseño galego». Esta exposición contará, para a montaxe, coas estruturas deseñadas polos nosos socios Xabier Rilo e Ricardo Tubío do estudio Cenlitrosmetrocadrado.
O #follow20 complétase cun programa paralelo para os días 11 e 12 de novembro. Toda a información sobre as actividades do festival está dispoñible na súa web.