Nova convocatoria para participar en From Spain With Design
O proxecto interno de READ que busca a internacionalización do deseño español lanza unha nova convocatoria para actualizar a plataforma e incluír novos traballos de profesionais do deseño. O 24 de febreiro é o prazo máximo para presentar candidaturas.
O pasado 1 de febreiro, READ abriu unha nova convocatoria para o proxecto FSWD para a promoción e a visibilidade do deseño español no mundo. Está aberta a todos e todas as profesionais que desenvolven o seu traballo en España e tamén para aqueles que o fan fóra das nosas fronteiras.
A convocatoria aberta a calquera campo do deseño estrutúrase en seis bloques: deseño gráfico e comunicación, deseño industrial e de produto, deseño de espazos e interiorismo, deseño de servizos, deseño multimedia e interseccións; esta última para aqueles proxectos disruptivos que se vinculan con varios sectores.
Valorarase a traxectoria, coherencia e consistencia dos estudos e profesionais independentes, mais tamén proxectos emerxentes e novos deseñadores que destaquen pola calidade dos seus traballos. Teranse en conta soamente traballos desenvolvidos nos dous últimos anos (2023-2024).
O 7 de febreiro os responsables do proxecto, entre os que se atopa a nosa socia Uqui Permui, explicaron a través dun webinario o proceso de presentación de candidaturas, así como o posterior proceso de selección, os prazos para as distintas fases e os obxectivos do proxecto. Podes acceder ao webinario desde aquí.