A situación sanitaria e as restricións impostas nos eventos sociais fixo imposible a celebración da entrega dos Premios Paraugas o pasado 20 de novembro, data prevista inicialmente. A organización decidiu adiar o evento, marcando como nova data o 12 de febreiro de 2021. O obxectivo principal deste aprazamento é conservar unha parte esencial da filosofía dos premios: servir de plataforma para a difusión do talento dos nosos e das nosas profesionais e como punto de encontro do sector.

O aprazamento na entrega de premios ven tamén acompañado dunha nova convocatoria para a recepción de proxectos. Todas as empresas e profesionais que queiran presentar as súas candidaturas teñen de prazo ata mediados de decembro. Coa intención de facilitar o proceso de inscrición, as candidaturas que xa fosen presentadas na convocatoria anterior poderán ser modificadas ou substituídas. 

Os Premios Paraugas recoñecen o traballo profesional feito en Galicia nos campos da creatividade, a edición, a impresión, o márketing, a comunicación e o deseño. Esta última categoría, patrocinada pola Axencia Galega de Innovación, inclúe 3 premios: Premio Paraugas ao Mellor Deseño Gráfico, Premio Paraugas ao Mellor Deseño Industrial ou de Produto e Premio Paraugas ao Mellor Deseño Dixital.

Debido á delicada situación económica derivada da crise sanitaria actual o prezo de inscrición conta este ano cun desconto do 25% nos dous primeiros proxectos presentados. A terceira inscrición e as seguintes serán de balde.

O xurado na categoría de deseño estará formado polos gañadores da pasada edición: Isaac Piñeiro, deseñador de produto e fundador de Isaac Piñeiro DesignStudio; o noso socio Roberto Núñez, responsable de estratexia e dirección creativa en Roberto Núñez Studio; e Daniel Camino, deseñador gráfico en Tony Le Brand.

Todos os detalles sobre esta nova edición dos Premios Paraugas están dispoñibles na súa web, dende onde tamén se pode facer a inscrición de proxectos.