O Concello de Pontevedra estrea imaxe institucional
O pasado mes de febreiro o Concello de Pontevedra facía pública a nova imaxe corporativa deseñada polo estudio Centlitrosmetrocadrado, logo dun proceso de selección baseado na «chamada a proxecto».
A proposta gráfica estivo amparada baixo o lema «Arria Oreta» que na antiga xerga dos canteiros de Pontevedra significa «auga e pedra». Baixo eses dous piares os compañeiros Xabier Rilo e Ricardo Tubío afrontaron o deseño, tendo en conta os elementos fundacionais da cidade. A nova imaxe dá continuidade ás anteriores e salvagarda os símbolos esenciais da mesma, poñendo en valor a súa historia: o escudo de medio punto, a auga do río Lérez, os tres arcos da ponte do Burgo e a antiga muralla medieval da cidade. O elemento que se elimina respecto das anteriores é a cruz e na nova imaxe adquire protagonismo unha única cor, o azul como referente da auga e tamén por razóns de contraste e lexibilidade.
O resultado é unha imaxe moderna, limpa, sólida e equilibrada, que permite unha mellor comunicación coa cidadanía. O proceso de implantación realizarase nos próximos meses e de maneira paulatina, comezando polas dependencias municipais e a rotulación dos vehículos do concello.
Desde a DAG queremos salientar tamén o proceso de contratación mediante a fórmula de «chamada a proxecto» como exemplo de boa práctica por parte dunha administración local, que conta co apoio e o asesoramento de entidades e profesionais relacionados coa materia, de principio a fin, amosando as boas sinerxías que se poden xerar entre os diferentes axentes implicados.