Chega o outono e trae un novo socio: Daniel Portela
Hoxe presentamos a Daniel, un profesional con sobrada experiencia e coñecementos en deseño audiovisual e corporativo, que de seguro haberá compartir con nós. Coa súa incorporación á DAG sumamos novos perfiles vencellados ao audiovisual. Benvido!
Ola. Son Daniel Portela, de Camposancos, na desembocadura do río Miño, na raia con Portugal. Son especialista técnico en realización e graduado en deseño.
Levo dende 1997 traballando no audiovisual. Estiven 20 anos editando vídeos en informativos e deportes na TVG e dende 2017 son o coordinador creativo da CSAG. Traballei en Tresdeseos en proxectos de 3D e posprodución. Fixen vídeos publicitarios para grandes corporacións. Fun o editor/posprodutor da serie Era Visto. Montei e deixei unha empresa con socios (e seguimos a ser moi bos amigos).
O 2012 puiden ir, da man de Álex Bragaña, a unha xuntanza do Café d Turno que me cambiou a percepción do deseño e a súa xente. Co tempo, cambioume tamén a vida deixándome claro que o asociacionismo, formal ou informal, é moi importante.
Dende a Radio Galega fago o videopódcast «Movendo Marcos», no que grandes profesionais do deseño e creatividade galega, algúns delxs socixs da DAG, fálannos dos seus proxectos máis destacados.
Saúdos e apertas.