Os Premios Anuaria 2020 xa teñen gañadores
A XXVII edición dos Premios Anuaria acaba de publicar as 124 obras seleccionadas, das cales cinco foron creadas por socios e socias da DAG.
O estudio DARDO, liderado pola nosa socia Conchi Mayo, acadou unha Selección Anuaria ao mellor deseño de publicación editorial polo libro «Futuros Posibles. Deseño para a innovación na era pos-covid» editado por GAIN, cun deseño adaptado ao novo contexto social. A segunda Selección Anuaria foi á mellor tenda web, polo traballo realizado para a artesá Rosa Méndez.
Pola súa banda, os compañeiros de Cenlitrosmetrocadrado, Ricardo Tubío e Xabier Rilo, obtiveron unha Selección Anuaria ao mellor embalaxe polo proxecto de etiquetado creado para as adegas Abalo Méndez da DO Rías Baixas; gráfica baseada nos catro valores que miden os viñedos cada mes e que permite variacións de deseño con cada anada.
O estudio vigués Desoños formado polas socias Noelia Fernández, Carlos Álvarez e Susana González, acadaron outra Selección Anuaria ao mellor programa de identidade corporativa pola imaxe creada para o grupo gastronómico Nove, referente da cociña creativa galega, baixo o concepto de cociña atlántica e inspirado na tipografía das embarcacións de pesca.
Roberto Núñez, acadou a Selección Anuaria ao mellor activo dixital polo traballo desenvolvido para a adega Davide nas redes sociais e na súa web, creando contido audiovisual cun código escultórico fóra do común.
Podes consultar todos os proxectos seleccionados nesta edición 2020 aquí.