Nace un novo premio para o deseño galego

Este certame, comisariado polo noso socio Pepe Barro, busca recoñecer a traxectoria de persoas, colectivos ou entidades cuxo traballo sexa relevante nas disciplinas do deseño gráfico e comunicación visual, deseño dixital, deseño de procesos de organización, deseño industrial e de produto, deseño de espazos e deseño de moda.

A deputada de cultura, Natividade González, presidirá o xurado que estará formado por unha persoa do ámbito da docencia en deseño, tres profesionais en exercicio de diferentes especialidades e unha persoa do ámbito empresarial ou cultural, especialmente relacionada cos eidos do deseño, a arte e a comunicación. 

Ademais das persoas do xurado, que elaborarán as súas propostas, tamén poderán presentar candidaturas argumentadas para a concesión do premio, por vía telemática,  todas as persoas físicas maiores de idade ou persoas xurídicas, interesadas na promoción do deseño. O prazo para facelo vai do 9 de abril ao 19 de maio e deberán cumplir os seguintes requisitos: 

• As persoas candidatas deberán ter como mínimo unha traxectoria de dez anos de dedicación profesional ao ámbito do deseño. 

• Deberán ter exercido a súa profesión en Galicia ou ser persoas galegas que, residindo fóra da Comunidade autónoma, presenten na súa traxectoria unha serie de obras relevantes realizadas para clientela gallega.

• Só se admitirá unha candidatura por persoa física ou xurídica e non se admitirán autocandidaturas.

O novo galardón contará cunha dotación de 6.500 euros e súmase ás iniciativas da Deputación da Coruña para premiar o talento galego, neste caso nun sector clave para a cultura, a industria e a comunicación. 

Precisamente este xoves, 10 de abril, terá lugar a cuarta edición da Gala da Cultura no Teatro Colón da Coruña, para a entrega dos premios cos que se recoñece o labor creativo noutros ámbitos como a banda deseñada, a narrativa, a poesía, a fotografía, a música, a artesanía, a arte gráfica ou a acción cultural pola igualdade de xénero. 

A programación do evento comezará ás 17.00 h co podcast A todas Luzes, onde se entrevistará ás persoas premiadas. A continuación, ás 18.00 h, poderase visitar unha mostra de encaixe de Camariñas, e finalmente a gala, que conta coa dirección artística da nosa socia Thais Suárez, dará comezo ás 19.00 h. Conducida por Susana Pedreira, con vestiario de José Matteos, incluirá actuacións de Fran Sieira e Alana, vestidos por La mapache, acompañadas dunha videocreación da cineasta Nela Fraga con imaxes do Arquivo do Patrimonio Oral da Identidade do Museo do Pobo Galego. A gala está aberta ao público até completar a capacidade do teatro.