Se falamos dos Premios de Arquitectura Ascensores Enor non serán moitas as persoas que non saiban do que estamos a falar. Estes galardóns, que naceron no ano 2005, son hoxe un dos eventos de arquitectura máis destacados da Península Ibérica. Nesta VIII edición, Ricardo Tubío e Xabier Rilo (cenlitros) foron seleccionados co proxecto que desenvolveron con Salgado e Liñares Arquitectos para a rexeneración do conxunto da Casa da Cotona, en Rois. Un novo exemplo de como arquitectura e deseño conflúen para lograr un resultado óptimo.

As boas novas chegan tamén dende outros puntos do planeta. Os European Design Awards acaban de anunciar a lista de premiados para este 2020 tan atípico. Alédanos moito comunicar que a tipografía Movement de María Ramos e Noel Pretorius (NM type) foi galardoada co Ouro na categoría «Tipografía Orixinal–Display». Este mesmo proxecto é ademáis finalista na 99ª edición dos ADC Awards. Neste caso os premiados daránse a coñecer durante o Creative Month, un programa completamente online e gratuíto que, ademáis de ofrecer charlas en vivo, permitirá interactuar con compañeiros e compañeiras de profesión.