Nesta edición temos que destacar o Premio Anuaria de Ouro concedido a Dardo, polo traballo realizado co libro DRIFT, miradas cruzadas entre diseño y arte contemporáneo, unha publicación que camiña pola historia do deseño á vez que propón outras visións da historia da arte en función da relación entre ambas as disciplinas. O resultado é un volume con ton uniforme a pesar da diversidade das fontes das que proceden as imaxes. A gráfica da portada expándese desde o D e marca a forma do libro.

Era comunicación recibiu unha Selección Especial Anuaria na categoría de mellor Campaña de Interese Social, polo traballo Ben veñas, Maio! realizada para a Concellaría de Normalización Lingüística do Concello de Pontevedra, xunto cos equipos de normalización (ENL) dos institutos de Pontevedra, e coa que promovían o uso do galego entre a mocidade a través das artes: teatro escolar, banda deseñada, narración curta, fotografía, poesía, curtametraxe e videoclip musical.

Por outra banda, Roberto Núñez acadou dúas Seleccións Especiais Anuaria por Observador e Perfeccionista, ambos na categoría de mellor Packaging. Viños de edición limitada que teñen a súa orixe nunha forma moi persoal de traballar, analizar e entender a natureza, a chamada viticultura reflexiva.

Como vén sendo habitual, a DAG tamén participou como xurado nesta XXVI edición dos Premios Anuaria.

Moitos parabéns a todos!

Podedes ver o resto de galardoados e galardoadas aquí.