Xornada "O deseño e boas prácticas, propostas de accións e apoio a PEMEs"
A Consellería de Economía, Emprego e Industria, a través da Axencia Galega de Innovación (GAIN), celebra o vindeiro 15 de maio, no CIS Tecnoloxía e Deseño de Ferrol, a xornada: “O deseño – boas prácticas, propostas de accións e apoio a PEMEs” no marco do Programa Deseño para a Innovación que está activo ata finais de 2020.
Esta xornada, dirixida a profesionais e empresas, introdúcenos nos dous programas de ámbito europeo nos que participa GAIN: Desig4Innovation, financiado a través do programa Interreg Europe, e User-Factor financiado a través do Interreg Atlantic Area. O primeiro está destinado a promover políticas públicas de deseño, a través do uso do deseño como condutor da innovación e mellora da competitividade das empresas. O segundo busca fortalecer a innovación en pequenas e medianas empresas co uso do deseño como ferramenta de innovación para adaptarse ás exixencias do mercado e dos usuarios. Para elo desenvolverase unha acción piloto con 25 PEMEs galegas.
A DAG forma parte do grupo de axentes do deseño que colabora coa Axencia Galega de Innovación nestes dous proxectos europeos. Coñeceremos os avances de cada un deles e teremos a oportunidade de conversar cos seus impulsores, ademais de asistir á presentación de novos casos de éxito galego coas empresas Bico de Xeado, EV Confort ou Mobalco.
A xornada é de balde pero precisa de inscrición previa.