Xornada «Isaac, editor»
A Asociación Galega de Editoras celebrará a Isaac Díaz Pardo, no ano en que se lle dedica o Día das Artes Galegas, cunha xornada centrada no seu papel á fronte de Ediciós do Castro.
Fotografía: Isaac Díaz Pardo, 1987, ©Xurxo Lobato
O programa, que se desenvolverá na mañá do xoves 27 de marzo, constará de dous relatorios. O primeiro a cargo de Charo Portela, quen fora subdirectora de Ediciós do Castro e coordinadora da actividade cultural do Instituto Galego da Información até 2008, que se centrará no perfil de Díaz Pardo como editor. O segundo, a cargo do noso asociado, o deseñador Pepe Barro, que ofrecerá unha panorámica sobre deseño e identidade do libro galego até os tempos da editora, fundada en 1963.
A través destas dúas conferencias achegarémonos ao universo visual e conceptual dun dos proxectos editoriais máis destacados de Galicia no século XX, especializado na recuperación da memoria histórica e divulgación cultural e científica galegas. Ademais de afondar na figura do seu fundador e socio de honra da Asociación Galega de Editores desde 2006.
A xornada terá lugar en horario de 10.30-13.00 h na sede do Consello da Cultura Galega e conta co apoio da Deputación da Coruña. O acceso é aberto ao público até completar a capacidade da sala.